لو كان الحبيب خاين .. ايه العمل ؟

ياريت كل اللي لهم خبرة وتجارب يقولولي أعمل إيه؟

القصة دي مش قصتي دي قصة واحدة قريبتي بس انا هانقلها لكم على لسانها ....

بتقول : كنا زملاء في الجامعة .. شدتني نظرات عينه لياا..شهم,راجل,فيه كل الصفات اللي

اي بنت تتمناها في فارس أحلامها .. تحول الاعجاب دا لحب من طرفين هو دا اللي انا كنت فاكراه

حبيته من كل قلبي .. بنيت أحلامي كلها معاه وعمري ما تصورت نفسي مع إنسان غيره .. بعد إنتهاء فترة

الجامعة استمرت علاقتنا صحيح ان كل واحد اشتغل في شركة شكل .. لكن علاقتنا كل يوم تجمد عن اليوم

اللي قبله .. كان بيوهمني اني كل حاجة في حياته وانه ما يقدرش يعيش من غيري .. وانا من غبائي وسذاجتي

صدقته ( وتكمل كلامها دا بدموع على خدودها تقطع القلب ) وكان كل ما يتقدملي أي حد أرفضه لأني مستنية الحبيب

الغايب .. ست سنين بعد الكلية وهو كل يوم يقولي النهاردة هاجي أخطبك لا بكرا لا بعده وكل يوم يطلعلي بحجة

وانا أصدقه لحد ما أهلي زهقوا مني لأني رفضت أكتر من عشر أشخاص إتقدمولي .. كل واحد طلعتله عيب عشان

انا في قلبي واحد بس .. والمهم في الموضوع انه كان كل ما أقوله في واحد جاء خطبني النهاردة يقولي : إرفضيه

انتي بتسأليني اعمل إيه .. إرفضيه على طول دا اذا كنتي عايزاني بجد .. طبعا انا صدقته وبقيت أرفض كل اللي يتقدملي

لحد ما جاء اليوم اللي عمري ما هنساه .. اليوم اللي اتبخرت أحلامي فيه .. اليوم اللي كرهت نفسي فيه .. اليوم اللي

حسيت فيه اننا ضعت بجد .. اليوم دا كنت قاعده أتفرج على التلفيزيون واهلي كلهم برا البيت .. سمعت جرس الباب بيرن

قمت عادي بفتح الباب لقيت واحد غريب ما اعرفهوش ..سألته أقدر أخدمك ..قالي : اتفضلي الظرف دا عطاهولي شخص

وقالي أوصله للشقة دي ... طبعا كل اللي عملته شكرته وانا ما أعرفش الظرف دا جواه ايه .. قفلت الباب ودخلت أفتح

الظرف الا لقيته كارت دعوة لفرح .. تتوقعوا فرح مين؟ .. فرح الانسان اللي انا مستنياه .. فرحه مع واحده غيري ..

والمشكلة اننا أعرفها ... حسيت ان الدنيا اسودت في عيني .. حسيت ان أحلامي بتتبخر قدام عيني .. صحيت من النوم

لكن بعد ايه .. بعد ما ضاعت سنين من عمري في انتظار واحد خااين زي دا .................... إنتهى كلامها بدموع

ــــــــــــــــــــــ

الكلام دا من اسبوع تقريبا ... تتوقعوا واحدة مكان دي تعمل إيه؟

وهل صحيح في ناس انعدمت الرحمة في قلوبهم للدرجادي؟

انا لو مكان البنت أخد سكينة واروح أدبحه وأدبحها وبعدين أدبح نفسي

كلهم زعلوا مني لما قلت كداا وقالولي انتي لسا في سن مراهقة وقرارك متهور

لكن اللي عايزه أعرفه .. أيه اللي ممكن تعمله البنت دي؟

تحياتي ليكم

شكرا ليكي على الموضوع
وانا في رايي ان هيا تحاول انها تنساه وتكمل حياتها بس ده اكيد هيبقا صعب عليها جداا
وانا عمري ما شفت انسان قاسي للدرجه دي