شوبيكوا لوبيكوا احنا بننصب عليكوا !!!!

10-06-2008, 05:26 AM

شوبيكوا لوبيكوا احنا هننصب عليكوا

حاسس إنك لوحدك؟ حزين ومكتئب وجواك شعور بإن الحياة لونها إسود مخطط بكحلي متلون برمادي؟

بتسمع كتير أغنية "عيد ميلاد جرحي أنا"؟ بتشتري شمع ملون وتولعه يوم عيد ميلاد جرحك إنت وبعدين تقف تغني -مع الديابة الوحدانية- "الأيام الحلوة بتعدي في ثواني" ؟

عرفت "سوسن" وقالت لك إنها بتموت فيك وبعدين شفتها بعينيك -اللي أكلهم الدود- وهي خارجة حاطّة إيدها في جيب "سيد" صاحبك من جنينة الأورمان الساعة 6 بالليل رغم إنها بتقفل الساعة 5 -"الأورمان" مش "سوسن" !-..

والدك بيبص لك بصة بتحسسك بإنك "هريدي" ولد عمه اللي في الصعيد اللي هيطخه عيارين عشان ياخد بتاره؟.. والدتك دايما بتحط "ورك الفرخة" لأخوك الصغير رغم إنها عارفة إنك مش بتاكل حاجة في الفرخة إلا وركها؟

نفسك تركب أسانسير في بيتكم -اللي هو دورين بس- عشان تركبه مرة فيحصل فيه عطل فيقع بيك فتيجي لك كسور مضاعفة وتروح المستشفى فترتاح من كل الناس الوحشة دول؟

ماتترددش.. اتصل بينا على خط "الفضفض فون "على رقم "000000000"
هنسمعك وهندلعك وهنشخلعك وهنحميك وهنلبسك وهنكسيك وهنطلعك زي الفل كأنك جوزين حمام بالفريك..

اتصل دلوقتي وفضفض معانا هتلاقينا كلنا بنسمعك.. اتصل بينا
على "........" نقول كمان الرقم
"........." نعيد كمان الرقم ".......... .." نزيد كمان الرقم "........." ممكن تسمع لنا الرقم "......." !

"لو كنت بتدوري على أقصر الطرق إلى شباب الجامعة، ونفسك تعرفي أسهل الطرق لقلب "هاني" و"تامر" و"لؤي" و"ياسر" و"رامي" و"حاتم" عشان "تأنتمي" مع كل واحد فيهم يوم في الأسبوع وتاخدي يوم الجمعة أجازة!
0000000000-اتصلي بينا على

لو كنت بتشعري بالحقد والغل والحسد تجاه صاحبتك "نورا" الجميلة الأمورة الحلوة ونفسك تعرفي طريقة تخليكِ زي القمر وأحلى منها مية مرة
0000000 اتصلي بينا علىلو شفتِ نفسك في المراية فحسيتِ بإنك بتتفرجي على فيلم رعب، ولو مشيتِ في شارع جامعة الدول العربية، فمافيش أي عربية وقفت لك، ولو ركبتِ أتوبيس زحمة فمافيش أي بني آدم طلع عنده ذوق قام وقعدك مكانه،
00000000 اتصلي بينا على

لو جربتِ كل أنواع الشامبو المستورد والمحلي، واستخدمتِ كل أنواع الزيوت من أول زيت "شل" لغاية زيت "التعاون" وفضل شعرك زي ما هو أنشف من الليفة وهي على الشجر وأخشن من الحجر وهو لسه على الجبل، اتصلي بينا على "........" خط "ياختي فون"

للماكياج والجمال والموضة..

"ياختي فون".. هيروشك وهيأيفك وهيخليكِ أحلى بنات الكون وأرق من كل الكائنات البرمائية والزاحفة.. اتصلي الآن..

"مع ياختي فون.. هتخلي كل الشباب مجنون" !

"أخي الفاضل.. ندرك مصاعب ومشاغل الحياة التي تعاني منها.. وندرك -أخي الفاضل- أنك بكل تأكيد -أخي الفاضل- لديك الكثير من التساؤلات التي لا تستطيع -أخي الفاضل- أن تبوح بها لأحد خوفا -أخي الفاضل- من أن يمثل هذا لك -أخي الفاضل- حرجا أو يثير حولك -أخي الفاضل- بعض من التساؤلات -اللي كده أو كده- أخي الفاضل..

اتصل بينا على ".......... ." ونحن في خط "الإيمان الصوتي" سنكون إلى جوارك -الجيم تنطق معطشة كما ينطقها أهل الخليج- وسنجيب عن كل أسئلتك -أخي الفاضل- الإيمانية، وسيتواصل معك -أخي الفاضل- نخبة من ألمع العلماء والشيوخ الذين يسهرون من أجل راحتك -أخي الفاضل- ويسعون دوما إلى معرفة كل ما هو جديد في عالم الفتوى حتى يقدمون لك -أخي الفاضل- آراء وفتوى تتماشى مع صحيح الدين..

معنا في "خط الإيمان الصوتي".. أنت في القلب.. بس اتصل الأول 000000000على

لو لاحظت هتلاقي إن الإعلانات دي اللي بتقدم خدمة مدفوعة الثمن
مقدما عبر الاتصال التليفوني بتركز على ثلاثة خطوط أساسية

"المشاكل العاطفية- الموضة والماكياج- الاستفسارات الدينية "

ده معناه أن الخطوط الثلاثة دول هم بالفعل أكثر الأشياء التي تشغل بال الشباب اللي هم عادة بيكونوا مستهدفين من الإعلانات دي..

الشباب.. حضراتكم يعني!

والسؤال اللولبي المحوري الجوهري هنا:

هل تثق في الخدمات والنصائح التي تقدم عبر خدمة تليفونية
مدفوعة الثمن؟ويا ترى جربتها مرة أو مرتين أو عشرة قبل كده؟وكانت النتيجة إيه؟
ممكن تكتبوا إجابة حلوة كده من غير ما تتصلوا على أي رقم تليفون

10-06-2008, 07:34 PM

وانا بشوف الإعلانات دى ببقى مستغرب جدا بقول هوه معقولة فى حد بالسذاجة دى ممكن يتصل ويكلمهم

وخصوصا لو كان الموضوع خاص

تلمىلى يا احلى ديرو

10-09-2008, 10:44 PM

ههههههههههههههه
شوفي يا هدير انا عمري ما جربت اعمل كده ابدا ومش عارفه بجد ايه ممكن تكون نتيجة نصيحه زي دي
بس اعتقد انه اي انسان بيكون في عنده ناس بيثق في رايهم وبيحترمهم ودول ممكن يعتمد عليهم اكتر
ومفيش داعي للحاجات دي

تسلمي عالموضوع

شاهنده · 10-09-2008, 11:01 PM

هههههههههه
موضوع حلو اوي
بس برده انا عمري ما عملت كدا
لان كله كلام فارغ
شكرا اوي

10-10-2008, 12:00 AM

ههههههههههههه يا بنتى نصدق مين دا كله مكاسب وبس مش موضوع حب بس
صدقينى فى شباب وبنات عبط كتير اوى بيعملوا الحاجات دى ههههههههههه

10-11-2008, 02:41 AM

صح في ناس كتير بتعمل الحاجات دى

انا مجربتش بصراحة ومعرفش ايه النتيجة بس انا مع هند انه مفيش داعي للحاجات دى

اكيد بيكون لينا ولو حتى شخص واحد نقدر نتكلم معاه

سانكس يا هدير ع التوبيك الجميل ده

10-21-2008, 10:46 PM

انا كتيييير بشوف الاعلانات دى بس عمرى ما جربت اكلمهم بس فيه ناس اكيد بتتصل بيهم بس بجد انا شايفة ان الناس اللى بيتصلو بيهم اكيد محتاجين يتكلمو بجد ويفضفضو ذى الغريق المتعلق بقشاية التوبك لذيذ جداااااااااااااااا

10-22-2008, 12:19 AM

مش مقتنع اصلا بيهم عشان كده
مش هجرب
بس اسلوب الكلام فى التوبك حلو
تسلم الايادى

10-22-2008, 08:31 AM

علمتنى الحياه والدنيا انه لا يوجد احن من يديا لتمسح دموعى

تحياتى
قاضى الحب

10-28-2008, 03:10 AM

والله في ناس بالسذاجه دي وبتعمل كده
وميرسي علي مروركم والحمد لله مفيش حد فينا بيعمل كده
سليم يا بيه

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اغنية مصطفى قمر ايوا انت	شاعر الليل	منتدى الاغانى السينجل	6	12-21-2008 10:42 AM
ثمز بمناسبه الحر اللي احنا فيه	شاعر الليل	الصور والثيمات والفيديو والنغمات	13	12-03-2008 07:52 AM